Se tiene 'o desiderio 'e 'na canzone...
sa' che vuò fa?...
Càntale 'e stienne a voce quanno ammore
te fa cantà!...
Si sto durmenno, me sceto
e nun trovo arricietto...
Quanno me songo scetato,
me votto d''o lietto!...
Che staje miezz' 'o mare?
- me mengo! -
Che staje 'mparaviso?
- nce vengo!... -
Senza scala si voglio... nce saglio!
pecchè saglio, penzanno... si voglio!
Miezz' 'e nuvole 'a strata m' 'a sceglio...
Me sbaglio, me mbroglio,
ma saglio e te piglio!
Sott' 'a l'acqua, sott' 'o viento,
sott' 'o nuce e Beneviento,
pe' cantà 'nzieme cu te:
"Bene mio e core mio!"...
pe' cantà 'nzieme cu te!...
Tengo nemice? Faccio 'o paro e sparo...
'E t tengo mente e dico: «Stongo ccà! »
E nun tremmo si sent' 'e di: «Te sparo! »
Chillo c' 'o ddice, '0 ddice, nun '0 ffà.
Si è p' 'o buciardo, nun me movo, aspetto.
('A buscia corre assaie, ma campa poco).
'O vuò vedè? '0 canusce comm' 'o «sette»,
va pè parlà, se fa una lamp' 'e fuoco.
'A calunnia? E chella «è un venticello»,
dico vicin' a 'o viento: «Nun sciuscià? »
Quann'ha fatt' 'a sfucata vene 'o bello,
allor' accuminciamm' a raggiunà.
E manco 'a morte, si me tene mente,
me fa paura. ' A morte è generale.
Ll'uommene sò rumanze differente,
ma tènen' una chiusa, unu finale.
M'arròbbano? Arreduco mmiez' 'a via?..
J' fatico e addevento chillu stesso,
ma, quanto voglio bene a mamma mia,
a mme me fa paura sul''o fesso!
Cielo
ca puntualmente
'o mes' 'austo
abbremecato
'e stelle
te presiente,
e ca te faie
cchiù blù
pecché
cchiù argiento
cchiù splendente
e brillante
sti meliune
'e stelle
'anna parè...
cielo,
tu saie che ssì
pè chistu munno,
pè nnuie ca t'aspettammo
e te vedimmo?
Sì 'o finale
ncantato
'e nu cunto
ca nuie stesse ammentammo,
e sulitariamente
c' 'o core
e c' 'o penziero
nce cuntammo.
cumme se specchia a mmare
dint' 'o cuntammo.
Cumme se specchia a mmare
dint' 'o scuro
'o ffuoco d''e granate!
Se spara p' 'a custiera,
tuorno tuorno...
Pè San Giuvanne,
Puortece,
Resina,
Torre 'o Grieco,
Pumpei,
Castellammare...
'A rimpetto
risponne
Vico Equense,
Sant'Agnello,
Surriento...
Aret' a na muntagna
nu bagliore:
spara Massa Lubrense.
Marciano pure spara...
e appriesso appriesso
sant'Agata
crapolla
Pusitano...
Spara Furore
Vietri
e sparano a Praiano.
Cielo,
sò 'e stelle noste,
sò 'e pparole mbrugliate
'e nu discorso
ca sultanto sparanno
trova 'o filo,
pè te dà na risposta
pè te dà segno 'e vita
pure nuie...
E ogn'anno,
'o mes' 'austo,
puntualmente
ognuno conta 'o cunto
a modo suio...
'A ggente ca me vede mmiez' 'a via
me guarda nfaccia e ride. Ride e passa.
Le vene ammente na cummedia mia,
se ricorda ch'è comica, e se spassa.
Redite pè cient'anne! Sulamente,
v' 'o vvoglio dì pè scrupolo 'e cuscienza:
io scrivo 'e fatte comiche d''a ggente...
E a ridere, truvate cunvenienza?
... Nun credo
Penziere mieje, levàteve sti panne,
stracciàtev' 'a cammisa, e ascite annuro.
Si nun tenite n'abito sicuro,
tanta vestite che n'avit' 'a fa?
Menàteve spugliate mmiez' 'a via,
e si facite folla, cammenate.
Si sentite strillà, nun ve fermate:
nu penziero spugliato 'a folla fa.
Currite ncopp' 'a cimma 'e na muntagna,
e quanno 'e piede se sò cunzumate:
un'ànema e curaggio, e ve menate...
nzerrano ll'uocchie, primm' 'e ve menà!
Ca ve trovano annuro? Nun fa niente.
Ce sta sempe nu tizio canusciuto,
ca nun 'o ddice... ca rimmane muto...
e ca ve veste, primm' 'e v'atterrà.
-------
Pensieri miei, levatevi queste panni
Stracciatevi la camicia e uscite nudi.
Se non avete un abito sicuro,
che farsene di tanti vestiti?
Andatevene spogliati per le strade,
e se fate folla, camminate.
Se sentite strillare, non fermatevi:
un pensiero spogliato fa la folla.
Correte sulla cima di una montagna,
e quando i piedi si sono consumati:
un'anima e coraggio, e vi gettate...
serrando gli occhi, prima di gettarvi!
Che vi trovano nudi? Non fa niente.
Ci sta sempre un tizio conosciuto,
che non lo dice... che resta muto...
e che vi veste, prima di sotterrarvi