L'olter ieer mentär s'aavi intrè 'ndä sul stradon che porta a B'sà
me pars da ved ammò cume una vöölt la cä dal frä, là dopu la curva sul rivon,
cunt i so cupp russ, mess rut e in mess di pasarin i ninn,
pusè sutt tra i tëcc e i muur g'aav anca chai di rundanin:
muur pien da crepp, un quai bucon stacaav e cunt l'usc sbarätaav.
Pö là in fund in mees al prää ho vust la sia Dela, l'aav propi lè,
cunt al sò fularin veerd al coll e cunt in cò un caplin biäänc
che la vultaav al fen cul bastunin e areent Papu, Ingelino e al me Batista.
Pusè innaans a mità prää cunt al fer par taiä l'aarb, al sgäsc,
l'aav stravacaav Ciapin e Luigi che cunt la cud al faav al fil al sò.
Sträc pär al laurä e pär l'arbaton dal so puus ad una gabaav
ätäc al foss la sia Nina e la sia Tugnina avan drè a parlä,
al siu Pedar cunt al fulcin a l'aav adrè a taiä un rubin
l'olter siu Pedar al bivaav dal fiaschet dal vin o forsi dl'äqua frösca
e un queidun pö, sò no chi, scunduuv al pisaav dadrè a un muron.
Pasaav intant pusè luntän Ingiulin cunt al so bö e 'l tumarlin
G'avän tucc mancavi dumà min: pö un clacson dun utumobil
da culp al al mà dasdaav saavi giamò ruvä a B'sà:
e dumà lì ho capiiv che intant ch'andavi saavi drè a sugnä.